2020-an eman zioten hasiera IZUKARI-ri Mikel Larratxe (Irun 1982) eta Joseba Baleztenak (Bera 1984) dozena bat kantari soinua emanez. Mikelek ereindako hitz eta melodiak Josebak ureztatu eta ondu zituen. Urrats horien fruitua da Ikari Lehena (Hagina Diskak 2024) taldearen lehen EP-a, su motelean ondutako 5 abesti aurkezten dituena.

IZUKARI sortzeko funtsezkoa izan da lurralde ezezagunetan barneratzeko sentsazioa, araurik gabeko uretan nabigatzekoa. Gauez, baso arrotzetan sartu dira, intuizioa izaki iparorratz bakarra. Baxu lineak, ahots melodiak eta piano notak izan dira kantak sortzeko lehen urratsak, sintetizadore eta gitarrez lagundurik eta eskura harrapatutako zein-nahi baliabideri zukua ateriaz, edozein aurreiritzitatik ihesi.

Diskoaren grabaketa Josebak berak zuzendu du, bera izan baita ekoizle nagusia eta amaierako nahasketaren arduraduna. Bere Duranako estudiotik musikari mordoa pasa dira, denak adiskideak: lehenik Felix Buff bateria-jole ezaguna (Willis Drummond, Rüdiger, Joseba Irazoki eta Lagunak…) eta Iñigo Telletxea baxu-jole eskarmentatua (Borrokan, Xabier Montoia, Anje Duhalde, Harat…) izan ziren oinarriak grabatzen Baleztena bera gitarran zela. Gerora etorriko zen Carlos Noain musikari hondarribitarra (Pinbol, Imago4, Naica) piano eta teklatuak grabatzera diskoaren hezurdura nagusia finkatuz. Musikari gehiagok ere parte hartu dute kanta desberdinetan beraien arrastoa utziz: Xiker Salaberria tronpetan, Borja Alkain ahotsean edo Miren Narbaiza eta Ander Mujika koroetan. Lana borobiltzeko ordea itsasoz beste aldera joan da diskoa Los Angeles-ko Will Borza teknikaria izan baita mastering arduraduna.

Ikari Lehena EP-a 200 alera mugatutako 12” biniloan editatu dugu. Era berean gure bandcamp-ean eskura izango da deskarga digitala. Taldeak espreski muzin egiten dio gaur egungo gainerako streaming zerbitzuetan parte hartzeari.